Интервју со Нина Ангеловска Станков, основач на Здружението за е-трговија на Македонија

Мојата пасија за е-трговија и воопшто е-бизнис, можам да кажам дека започна на Економскиот факултет УКИМ, со изборот на департманот Е-бизнис во 2006 година. Практично, од тогаш „го дишам“ пазарот на е-трговија — најпрво во теорија, а веднаш по дипломирањето и во пракса, со лансирањето на Grouper во 2011 година. Во текот на студирањето учествував на многу натпревари — ги сметав за начин да се „тестирам“ себеси, а учев и нови работи бидејќи вложував доста енергија во подготовките. Во 2011 година, непосредно пред дипломирањето, победив на натпреварот за најиновативен бизнис план, организиран од Националниот центар за развој на иновации и претприемачко учење (NCDiel) при Машинскиот факултет, каде добив мал грант за да започнам сопствен бизнис. Станувањето претприемач и водењето на сопствен бизнис не е нешто што го посакував од дете. Веројатно претприемачките гени од моите родители и начинот на кој ме воспитувале претставуваа солидна основа и почетна точка, но главниот поттик беше најверојатно добивањето на наградата, која ме охрабри веднаш по дипломирањето да се впуштам во започнување сопствен бизнис.