_1780497461157.jpg&w=3840&q=75)
Пазарот на труд се менува, а со него се менуваат и кандидатите. Она што функционираше пред неколку години, денес сè почесто не ги носи истите резултати. Компаниите неретко велат дека „нема кандидати“, но вистинското прашање можеби е дали процесите за вработување сè уште се прилагодени на начинот на кој денешните кандидати размислуваат и носат одлуки.
Младите генерации пораснаа во средина каде информациите се движат брзо, содржините се кратки, а вниманието е поделено на десетици работи истовремено. Кога секојдневно консумираат содржина за неколку секунди, долгите и сложени процеси за аплицирање често претставуваат причина да се откажат уште пред да започнат.
Денес, телефонот не е само алатка за комуникација – тој е место каде што се информираат, купуваат, комуницираат и носат одлуки. Ако процесот за аплицирање не функционира едноставно преку мобилен телефон, компаниите ризикуваат да изгубат кандидати уште на првиот чекор.
Истовремено, се менуваат и очекувањата околу комуникацијата. Долгите периоди без одговор создаваат чувство дека компанијата не е заинтересирана. Младите кандидати очекуваат побрз фидбек, појасна комуникација и чувство дека некој навистина го вреднува нивното време.
Ова не значи дека младите кандидати се помалку заинтересирани за работа. Напротив, тие едноставно функционираат поинаку. А компаниите што ќе успеат да го разберат тоа ќе бидат оние што ќе ги привлечат најдобрите таленти пред конкуренцијата.